கோபம் கொள்ளுதல் வேண்டும்

கோபம்
இறைவன் கொடுத்த வரம்

கோபப்படுதல் வேண்டும்
இல்லாவிட்டால்
கற்சிலைக்கும் மனிதருக்கும்
வித்தியாசமில்லை

கோபம் கொள்பவனைவிட
கோபப்பட வைப்பவனே
குற்றம் செய்கிறான்

கோபப்படுவதென்பது
தனக்குப் பிடிக்காதவற்றை
அழுத்தமாய்ச் சொல்வது

ஏன் கோபப்படுகிறாய் என்று
கேட்பதைவிட
ஏன் கோபப்படவைத்தோம் என்று
தன்னையே கேட்டுக்கொள்வது
நியாயம்

கோபம் இல்லா இதயத்தில்
நியாயம் இருக்க வாய்ப்பில்லை
கோபம் இல்லா கண்களில்
கருணை இருக்க வாய்ப்பில்லை
கோபம் இல்லா எதிர்பார்ப்பில்
அன்பிருக்க வாய்ப்பில்லை
கோபம் இல்லா உடலில்
வீரம் இருக்க வாய்ப்பில்லை
கோபம் இல்லா குணத்தில்
கற்பிருக்க வாய்ப்பில்லை

கோபத்தை வெளிக்காட்டுவதில்
அளவற்ற நாகரிகம் வேண்டும்
ஆனால்
கோபமற்ற பிணமாய்
ஒருநாளும் ஆகிவிடக்கூடாது

கோபம் வந்தவன்தான்
நேர்மையை நிரூபிக்கிறான்
கோபம் வந்தவன்தான்
போட்டியில் வெல்கிறான்
கோபம் வந்தவன்தான்
சுயமரியாதை உயர்த்துகிறான்
கோபம் வந்தவன்தான்
சுதந்திரக்கொடி ஏற்றுகிறான்

இரத்தம் கொதித்தால்தான்
வக்கிரங்கள் வெந்துமடியும்
அறிவு கொதித்தால்தான்
ஆராய்ச்சிகள் வெற்றிபெறும்
அன்பு கொதித்தால்தான்
உறவுகள் வலுப்படும்
உயிர் கொதித்தால்தான்
வாழ்க்கை உண்மையாகும்


அன்புடன் புகாரி